Umwaka w'2025 wabaye umwaka udasanzwe mu vyerekeye umwimbu muri BMBC GROUP. Niwo mwaka wabonetsemwo abakiriya benshi kuruta iyindi myaka yose. Ni wo mwaka wabayemwo ugosozera no gushikiriza imigambi y'inzu abakiriya benshi. Uburongozi bwa BMBC GROUP bukaba bwashimye gusangira n'abakiriya, abakozi n'abandi bafatanyakivi n'imiryango yabo mu gutangura umwaka mushasha w'2026.

Ku ncuro yambere, Sosiyete ya BMBC GROUP yaratunganije umusi wayihariwe ku wa 4 Nzero 2026 (BMBC DAY 2025). Uwo musi washinzwe mu ntumbero yo kwiginana hagati y’abo bose bagize uruhara mu gukuza sosiyete uhereye kuva ivutse, hamwe n’ivyaranguwe mu mwaka w’2025. Muri abo harimwo abakozi ba BMBC GROUP n’amashami yayo yose, abakiriya, abo BMBC GROUP ishorera ibikoresho n’iyindi mirimo (fournisseurs) hamwe n’iyindi mirwi itandukanye y’abasangirakivi. Uwo musi ukaba wabaye n’akaryo ko kwipfurizanya ivyiza mu mwaka mushasha w’2026. 

Ubutumwa nyamukuru bw’uwo musi bwatanzwe n’umuyobozi mukuru wa BMBC GROUP David Ntamakuriro, bwari bushimikiye ku gushima intererano y’umwe umwe wese mu bakozi, mu bakiriya no mubasangirakivi, batumye haba ibikorwa n’umwimbu bidasanzwe mu mwaka w’2025.

Mw’ijambo ry’ikaze yashikirije abitavye urubanza, umuyobozi wa BMBC GROUP yamenyesheje ko yishimira cane igikuriro n’igihagararo sosiyeye igezeko ufatiye cane cane kw’irwirirana ridasanzwe ry’abakiriya mu mwaka w’2025. Umwaka w’2025 waranzwe kandi n’isekeza ritari bwaboneke ryo gushikiriza amazu abakiriya bacu. Kuva iryo sekeza ritanguye mu ntango z’ici ryo mu mwaka uheze, abakiriya batari bake bagizwe ahanini n’Abarundi baba mu mahanga barashikirijwe icese amazu yabo mu bigwati vyitiriwe Abarundi baba mu mahanga (Diaspora Cities) vya Gahahe, Tenga na Kiyange (Miroir).

Vyongeye, nk’uko umuyobozi mukuru wa BMBC GROUP yabandanije abishikiriza, BMBC Group yarashize umwete mwinshi mu bikorwa vyo kwigisha no gukarihiriza ubwenge abakozi mu ntumbero yo kwongereza ubushobozi no kurwiza urugero rw’umwimbu. Inganda zitandukanye zaratunganijwe mu bisata vyose haba ku bakozi bo mu rwego rw’ubuyobozi bwa sosiyete canke ku bahinga n’abafundi bakwiragiye ku mashantiye atandukanye. Mu bigishijwe hakaba kandi harimwo n’abimenyereza bavuye ku mashure atandukanye mu gihugu.

Umuyobozi wa BMBC Group yaremeje kandi ko ashimishwa n’imigenderanire myiza iri hagati ya sosiyete n’abakiriya bayo, ndetse n’abandi basangirakivi, ivyo bikagaragazwa n’uko ata rubanza na rumwe sosiyete ifitaniye n’umuntu n’umwe canke urwego na rumwe muri sentare. Ku bwiwe, iyo migenderanire myiza ni igipimo c’ingene abakiriya n’abandi basangirakivi bishimiye ingene bakorana na BMBC Group.

Ivyo mbere bikaba vyaremejewe ku mugaragaro n’abakiriya hamwe n’abasangirakivi bafashe ijambo muri urwo rubanza, aho abatari bake bashinze intahe z’inkoramutima ku kuntu bamenye n’ingene bakorana na BMBC Group yabashoboje kurangura imigambi y’indoto zabo.

Mu gusozera urubanza, David Ntamakuriro yarasubiye kwizeza imirwi yose y’abantu bafise uruhara mu bikorwa vya BMBC Group ko sosiyete yabo yifashe neza, agirako abemerera ko igiye kwongereza umwete n’umuvuduko kugirango abayitura baronke serevisi ziri ku rugero badashobora kuronka ahandi hose, baba abafise imigambi y’ubwubatsi canke abakorana na BMBC Group iyindi mirimo.



Mu ntumbero yo kwerekana icubahiro n’agaciro aha umuntu wese yitavye urubanza canke akorana na BMBC mu buryo butandukanye, umuyobozi mukuru wa BMBC Group yaraciye ku meza imwe imwe yose kugirango aramukanye n’abatumire n’imiryango yabo yongere abipfurize umwaka mushasha mwiza w’2026.